Placebo-ს “MEDS” მუსიკის მიღმა

Placebo-ს “MEDS” მუსიკის მიღმა

ბევრია თქვენს გარშემო ისეთი პიროვნება, რომელიც ფსიქოტროპულ წამლებს იღებს  (მათი თქმით) „ადამიანებთან კომუნიკაციის დასამყარებლად და ნორმალურად ცხოვრებისთვის“, ან, უბრალოდ, მკურნალობის გამო? გინახავთ ისინი წამლის ზემოქმედების ქვეშ და მის გარეშე? თუ – კი, მაშინ უკეთ გაიგებდით პლასებოს მეხუთე ალბომის (2006) “Meds”-ის ამავე სახელწოდების მთავარი სიმღერის შინაარს.

სიმღერა აბებზე დამოკიდებული ადამიანის შესახებ არის, რომელსაც დაკარგული აქვს რეალობის აღქმა. წარმოსახვითი სამყაროსგან გამოწვეული ემოციების გასაძლიერებლად კიდევ და კიდევ მეტი დოზის მიღება სურს. თუმცა გამოფხიზლებულს არ მოსწონს მისი ცხოვრება, ვერ ხვდება მის მიერ გადადგმული ნაბიჯების შინაარს, მიზანსა და მნიშვნელობას, რაც ისევ წამლის მიღებისკენ უბიძგებს. იმედგაცრუებული ადამიანის მონოლოგი, რომელიც გამოცდილებასა და ემოციებზეა დამყარებული, მოსვენებას არ აძლევს და შუაზე ხლეჩს ორ – მისეულ და ჩვენეულ რეალობებს შორის. და ამ ზღვარზე მყოფი ის ამბობს „I was alone, falling free, trying my best not to forget“.

სიმღერაში სასმელი, წამლები და ურთიერთობები ერთმანეთზეა დამოკიდებული. ერთი მეორეს ეხმარება რეაქციაში შესასვლელად, ეს ორი ერთად კი მესამეზე ზემოქმედებს. და როცა გგონია, რომ ურთიერთობა უკეთესია, რეალობაში იკარგება ყველაფერი, რასაც კარგი შეიძლებოდა დარქმეოდა.

ტექსტის ავტორი ბრაიან მოლკოა, რომელიც ინტერვიუებში აცხადებს, რომ მისი სიმღერები მთლიანად მის ბექრაუნდზეა დაფუძნებული. ის სიმღერებს წერს წარსულ გამოცდილებაზე და უმეტესად შეუმდგარ ურთიერთობებზე (თუმცა, ტექსტებში აქტუალური თემებია LGBT პირების პრობლემებიც). ეს სიმღერაც, ვფიქრობ ერთ-ერთი იმ პერიოდის გახსენებაა, როცა მოლკო ნარკოტიკულ საშუალებებს იღებდა. 1997 წელს, New York Doll – ისთვის მიცემულ ინტერვიუში მოლკო აღნიშნავდა: „ჰეროინი ერთადერთი ნარკოტიკია დედამიწაზე, რომელიც არ გამისინჯავს“.

ჯგუფის შექმნის დღიდან, ნარკოტიკები და სასმელი ყოველთვის დიდ გავლენას ახდენდა მათ სიმღერებზე, როგორც მუსიკალურად, ასევე ლირიკის თვალსაზრისით. წევრები ამის შესახებ ღიადაც საუბრობდნენ. თუმცა, საზღვარი მათ „კაიფსაც“ აღმოაჩნდა და 2010 წელს, მოლკომ თქვა, რომ ის და ბენდის წევრები ნარკოტიკების მოხმარებას შეეშვნენ.

ალბომის სრული ვერსია

https://www.youtube.com/watch?v=8yshF6mcoxU

ალბომ “Meds”-ის შესახებ, ბრაიან მოლკო ამბობს, რომ მისი შედგენა ძალიან სწრაფად მოხდა, რადგან მათ 20 სიმღერამდე უკვე ჰქონდათ დაწერილი, საიდანაც 13 საუკეთესო შეარჩიეს. „მუშაობის პროცესში, ჩვენს ლეიბლთან დადებული ხელშეკრულების თანახმად, სიმღერებს ჩვენ ვირჩევდით. ეს მუსიკოსისთვის ძალიან მნშვნელოვანია, რადგან თვითონ განსაზღვრავს რა სათქმელი უთხრას მის მსმენელს. არც დროში ვყოფილვართ შეზღუდული. ისეც კი მოხდა, რომ ალმობის გამოშვებამდე სამი კვირით ადრე რამდენიმე სიმღერა შევცვალეთ,“ – ამბობს მოლკო ერთ-ერთ ინტერვიუში.

ბევრი კითხვა იყო გაჩენილი ალბომის თემატიკასთან მიმართებაში – სექსი/ნარკოტიკები და ა.შ. ეს გამოწვეული იყო იმით, რომ 2005 წლის დასასრულს, მოლკოს მეგობარი გოგოსგან, ჰელენა ბერგისგან, ბიჭი შეეძინა. ჯგუფის ვოკალისტი ინტერვიუებში ამბობს, რომ ბავშვის დაბადებამ მასზე იმაზე მეტად იმოქმედა ვიდრე ამას ელოდა. „ჩემს ცხოვრებაში მისი გამოჩენის შემდეგ, ბევრი რამ შეიცვალა. ბავშვმა შეცვალა ჩემი ცხოვრების სტილი, თუმცა ეს არ არის აუცილებელი წინაპირობა, რომ შეცვლილიყო ის თემები, რაზეც აქამდე ვწერდი,“ – ასე უპასუხა ალბომ „Meds”-ის ლირიკით დაინტერესებულ ადამიანებს.

ეს კი ამ სიმღერის ერთ-ერთი საუკეთესო live

PLACEBO

Music: alternative rock

Since: 1994

Band Members: Brian Molko, Stefan Olsdal, Steve Forrest

 

კომენტარები

კომენტარი